ألقى الرئيس عبد الفتاح السيسي كلمة بمناسبة الذكرى الثانية والستين لثورة 23 يوليو 1952، بثها التلفزيون المصري، وإليكم أبرز ما جاء فيها:

- وصف السيسي التحدي الذي تواجهه مصر حاليا بأنه تحد وجودي وليس اقتصادي.

"لازم تعرفوا إننا في مواجهة ضخمة جدا.. وأنا مش ببالغ أنا بتكلم بمنتهي الصدق والأمانة.. التحدي اللي عندنا مش اقتصادي إنما فيه تحدي وجودي... فيه ناس وتخطيط وأدوات شغالة عشان الدولة المصرية ماتستمرش.. انما الحكومة والجيش والشرطة مش كفاية للمواجهة ..محدش يهزم شعب أبدا ولا يهد دولة لو فيها شعب واعي يقظ ومنتبه".

- دعا السيسي الشعب إلى عدم الخوف مما يحدث حاليا من حوادث عنف وإرهاب خاصة بعد ما حدث في الوادي الجديد.

"الواقعة اللي حصلت في الفرافرة.. أنا شوفت رد الفعل الموجود والاعلام تناوله ازاي والراي العام.. انا مش عايزيكو أبدا لما تحصل حاجة زي ديه تتلخبطوا وتتهزوا .. كونوا واثقين في نفسكو.. في الجيش اللي جزء منكو .. كان قدامنا خيارين يا يحصل فينا اللي بيحصل بره يا إما الجيش والشرطة ياخدوا الضربة.. الجيش يقتل هو الأول ويستشهد قبل ما يتمس المصريين".

في إشارة إلى الهجوم المسلح شنه مسلحون على نقطة لحرس الحدود قرب واحة الفرافرة بالوادي الجديد على بعد 400 كيلو متر من القاهرة يوم السبت الماضي ما أسفر عن مقتل ضابطين بالجيش وضابط صف و19 جنديا.

- وصف السيسي قرارات زيادة أسعار الطاقة بالقاسية، وأكد أنها جاءت لمصلحة الوطن.

"أنا عايز أوجه كل الشكر لكل مصري ورد فعل المصريين تجاه الاجراءات الاقتصادية اللي اتعملت مؤخرا .. تقليل الدعم وخفض عجز الميزانية هو إجراء قاسي ولكن كان لابد منه .. لابد إننا ناخد اجراءات صعبة عشان مصر .. أنا بشكر المصريين جدا وكل الي قال إن الموضوع خطر جدا.. هقوله أنا كنت براهن على المصريين".

في إشارة إلى قرار الحكومة أوائل الشهر الجاري بفرض زيادات كبيرة على أسعار الوقود. وزادت أسعار البنزين والسولار والغاز الطبيعي للسيارات بنسب تتراوح بين 40 و175 بالمئة. كما رفعت حكومة رئيس الوزراء إبراهيم محلب أسعار الغاز الطبيعي لمصانع الأسمنت والحديد والصلب بين 30 و75 بالمئة.

- أعلن السيسي وجود مشروعات تنموية تقوم بها الحكومة حاليا. 

 "إحنا شغالين في أربع موضوعات عشان نمو البلد هننطلق فيهم خلال الفترة اللي جاية الزراعة والطرق اللي إحنا محتاجنها للتنمية ولاحظنا 10% من اجمالي طرق مصر خلال سنة هتكون نقلة كبيرة.. ومشروع تاني أنا مش عايز اتكلم فيه دلوقتي أنا هخليه مفاجاة".

ولم يذكر السيسي المشروع الرابع. ويشير السيسي إلى تفاصيل استصلاح مليون فدان، في سيناء ومحافظات الصعيد وامتداداتها في منطقة الصحراء الغربية لخطة للتنمية التنمية الزراعية.

- السيسي جدد التأكيد على دعم مصر الكامل للقضية الفلسطينية والعمل على حلها.

"الأزمة في قطاع غزة ... مصر قدمت للقضية الفلسطينية 100 ألف شهيد .. مصر قدمت وستقدم.. صعب إن حد يزايد على دور مصر في القضية الفلسطينية او على دورنا على الصعيد العربي كله.. مصر دولة مسؤولة".

في إشارة إلى المبادرة التي قدمتها مصر لوقف إطلاق النار في غزة، التي وافقت عليها الحكومة الإسرائيلية والقيادة الفلسطنية ورفضتها حركة حماس.