أطلقت المؤسسة المصرية لمكافحة سرطان الثدي، حملة على فيس بوك تحت عنوان "سعادة حوا" لتوجيه السيدات نحو طريق السعادة من خلال نصائح تلقيها داليا نبيل مدربة الحياة.

وقالت داليا نبيل، على صفحة الحملة، على فيس بوك "هنقول لكل ست ازاي تبقي سعيدة وتطلع كل اللي جواها وتتجاوز همومها ومشاكلها، وهنعلمها ازاي تخلي السعادة عادة في حياتها".

وتضيف "السعادة تبدأ بترتيب أولوياتك في الحياة صح، وازاي توزعي الحب والسعادة صح.. حبي ربك ثم نفسك وبعدهم يجي أي حد؛ أهلك، جوزك، أولادك، شغلك حسب أولوياتك انتي".

وتستمر الحملة على فيس بوك طوال شهر نوفمبر بخطوات تقدمها داليا نبيل عبر صفحة الحملة وتتفاعل من خلالها مع متابعي الحملة.

وكانت خطوات طريق سعادة حوا كما نصحت داليا نبيل كالتالي:

"حبي نفسك"

وتوضح مدربة الحياة "حبك لنفسك مش أنانية ده طبيعة كونية بس"، قائلة:"احنا وسط الزحمة والمسؤوليات بننسى نفسنا و بننسى هواياتنا واهتماماتنا والحاجات الصغيرة اللي بنحبها وبتفرحنا، ويمكن نكسل نهتم بصحتنا".

وتوجه نصيحة لكل السيدات "الحقي نفسك وصالحيها واهتمي بيها عشان تعرفي تكملي مسيرة الحياة وانتي سعيدة".

"صالحي نفسك"

ودعت داليا نبيل النساء إلى التصالح مع أنفسهن، قائلة "اتصالحي مع نفسك وحاولي بكل طاقتك إنك تكوني من بره زي من جوه".

وأضافت "حاولي تقللي الفجوة بين اللي بتظهريه وبتتعاملي بيه وبين اللي نفسك تكوني عليه، وبكده هتكوني في سلام داخلي ورضا وده من أهم خطوات سعادتك".

"متلوميش نفسك"

ورأت أن كثرة لوم المرأة لنفسها تبث طاقة سلبية في نفسها، موضحة "بطلي تلومي نفسك وتجلديها على أتفه الأسباب وتحاسبيها على كل الأخطاء حتى لو مش بتاعتك".

وقالت داليا نبيل إن مراجعة الأخطاء أمر محمود ولكن بدون إفراط في ذلك، مشيرة إلى أن جزء من تجاوز الخطأ واستمرار الحياة نسيانه.