تحت عنوان "تحويشة رمضان"، تبدأ مدربة اليوجا هنا كمال حملة تستمر على مدار شهر رمضان لتقديم نصائح يومية تستهدف التخلص من الكسل والعصبية وكل العادات السيئة أثناء الصيام.

وقالت هنا كمال مؤسسة مركز "35 ب" لليوجا والتأمل المخصص للسيدات، لأصوات مصرية، إن الحملة ستتضمن تقديم معلومات صحية وتمارين يوجا وأنظمة غذائية سيتم نشرها مكتوبة وعبر فيديوهات يومية من خلال موقع فيس بوك.

وتستهدف الحملة المساعدة على التخلص من السموم على المستوى الجسدي والذهني والنفسي.

وأضافت "في يوم هنقول للناس إزاي يشربوا ميه صح، ويوم تاني إزاي نخلي العصبية تقل مع الصيام ونتخلص من الطاقة السلبية، وإزاي نركز في الصلاة، وهنقدم نصائح تغذية تساعد الناس المدخنة ومدمنين الشاي والقهوة خلال الصيام وتمارين يوجا تنشط الدورة الدموية".

وأنشىء مركز "35 ب" لليوجا والتأمل في يناير 2014، ويبلغ عدد متابعي صفحته على فيس بوك -التي تحمل نفس الاسم- 13 ألف مشترك.

وعن فكرة "التحويشة"، قالت "مع بداية الحملة هندعو الناس إنهم كل ما يجربوا تمرين أو نصيحة وتجيب معاهم نتيجة إيجابية يكتبوا في ورقة ويحطوها في برطمان إزاز، عشان في آخر الشهر كل واحد يشوف الأهداف اللي حققها وقدر يحوش كام حاجة من اللي اتقالت على مدار 30 يوم".

وأشارت إلى أن الحملة سيكون لها تواجد في الشارع أيضا، قائلة "متطوعات من المركز هيوزعوا كروت فيها نصائح ومعلومات عن الحملة بشكل أسبوعي، وبندعو كل الناس إنها تشارك معانا في نشر الكروت على مستوى كل المحافظات عشان الفايدة تعم على الناس كلها".

وأشارت إلى أنها ستكون متواجدة أيام الجمعة والسبت من كل أسبوع خلال رمضان للإجابة على الأسئلة والاستفسارات من المشاركين في الحملة عبر صفحة فيس بوك، وقالت "ممكن أي حد عاوز نصيحة في موضوع معين يبعتلنا أو يشاركنا باستفادته من المعلومات".

وعن فوائد ممارسة اليوجا خلال الصيام، قالت هنا كمال "بيكون لها تأثير سحري وبتساعد على التخلص من التعب والكسل وتنشيط الدورة الدموية، والتمارين اللي هننشرها من خلال الحملة هتكون سهلة تتعمل بالإيد والعين عشان أي حد يقدر يعملها وهو صايم، حتى وهو في الشغل".

وأشارت إلى أن أفضل وقت للممارسة اليوجا خلال الصيام قبل ساعة أو نصف ساعة من موعد الإفطار أو بعده بنحو ساعتين.