حذرت مدربة الحياة، داليا نبيل، النساء من إهدار الوقت في الأعمال المنزلية ورعاية الزوج والأبناء وعدم الاستمتاع بالحياة من خلال تخصيص وقت لها يوميا.

ووجهت مدربة الحياة نصيحة للنساء قائلة "خصصي لنفسك كل يوم ولو نص ساعة ترجعي تمارسي فيها هوايات كنت بتحبيها ونستيها، أو تتفرجي علي حاجه تضحكك، أو تسمعي فيها الموسيقي اللي بتحبيها أو ترسمي أوتمشي.. المهم الوقت ده لنفسك وبس".

كما نصحت النساء بتنظيم أوقاتهن، قائلة "اعملي جدول أعمال يومي لنفسك وسجلي فيه كل التفاصيل بدقة وقسمي يومك ما بين عمل لربك، عمل بعائد مادي، عمل لنفسك، عمل من أجل الأخرين، تمرين جسدي، تمرين ذهني".

كانت المؤسسة المصرية لمكافحة سرطان الثدي، أطلقت حملة "سعادة حوا" الأسبوع الماضي على فيس بوك لتوجيه السيدات نحو طريق السعادة من خلال نصائح تلقيها داليا نبيل مدربة الحياة.

وتستمر الحملة على فيس بوك طوال شهر نوفمبر بخطوات تقدمها داليا نبيل عبر صفحة الحملة وتتفاعل من خلالها مع متابعي الحملة.

ونصحت داليا نبيل النساء بمحاولة إشباع رغباتهن حتى الصغيرة منها، قائلة "كُلي اللي نفسك فيه، وألبسي اللي بترتاحي فيه، وروحي المكان اللي بتحبيه بشرط انك ماتظلميش حد ولا تقصري في واجباتك ولا ترتكبي أي أخطاء".

ورأت أن أعلى درجات السعادة في العطاء وليس الأخذ، مؤكدة "لو عايزة تبقي سعيدة خليكي سبب في إسعاد غيرك.. فالشعور بالسعادة بيتحرك في دواير، يعني اللي هتديه هيرجع لك أضعاف وأضعاف".

وتعتبر مدربة الحياة أن إحصاء النعم من الأشياء التي تزيد من الرضا وتحقق السعادة، وقالت "من النهاردة أبدئي يومك بعد النعم اللي في حياتك بالتفصيل حتى أصغرها وماتنسيش صحتك وحواسك وأهلك وأولادك وأصحابك وشغلك وبيتك، وكل يوم قرري أنك هتستمتعي بنعمة منهم بأقصىي طاقتك".

وتقول داليا نبيل "لو ركزتي علي عمل الحاجات اللي نفسك فيها وبتسعدك بدلا من نقض الآخرين والبحث عن أخطائهم ونقاط ضعفهم هتوصلي للسعادة اللي بتدوري عليها".