تقدم مدربة الحياة داليا نبيل تسع نصائح للسيدات لعبور السنة الأولى من الزواج بنجاح، لافتة إلى كونها أهم وأخطر مرحلة في الزواج.

وقالت داليا نبيل، لأصوات مصرية، إن أول نصيحة لكل سيدة هي ترتيب الاهتمامات والأولويات ومصارحة النفس بالعيوب، مضيفة "مش عشان تكون نقط ضعف وتهز ثقتها بنفسها لكن عشان  تشتغل عليها وتتحول لإيجابيات".

أما النصيحة الثانية فهي اختيار الشخص الأنسب وليس المثالي، قائلة لكل سيدة "اختاري كويس جدا وركزي في الاختيار لأنه الأساس، اختاري اللي اهتمامته وأولوياته شبهك، وده أهم من تشابه الصفات، اختاري اللي يبسطك ويفرح لنجاحك وبيعرف يهتم بيكي بطريقة توصلك وتسعدك مش يهتم والسلام".

النصيحة الثالثة هي وضع قوانين للحياة المشتركة في بداية الزواج وتوزيع مهام المنزل والحياة، مخاطبة كل سيدة "اعملوا سوا دستور لحياتكم وكيانكم الجديد.. اللي لأوله اتفاق يبقي متين ويعمر ويريح ويعيش" .

النصيحة الرابعة هي عدم اعتبار الوصول للفستان الأبيض وعش الزوجية هي نهاية المطاف قائلة "دي محطة من محطات الحياة مش نقطة الوصول .. لازم تفضلي تشتغلي علي تزويد قطار الحب أول بأول بالحب والاهتمام والمشاعر وأولهم وأهمهم الاحترام.

نصيحة مدربة الحياة داليا نبيل الخامسة لكل سيدة "حبي جوزك بطريقتك بس لازم ولابد تهتمي بيه بطرقته هو .. يعني لما تحبي تفرحيه لازم يكون بالحاجة اللي بيحبها ويفضلها مش على ذوقك..مشيها على ذوقه بس بطابعك الخاص".

النصيحة السادسة هي عدم انتظار الشكر والمقابل وتقول داليا نبيل "دربي نفسك إنك تدي من غير ما تستني مقابل، استني شوية وهو هيشكرك بنفسه وبطريقته وصدقيني هيبقي طعمها أحلى من إنك تستني رد الفعل ولو محصلش تتقلب نكد وخناقة".

"ممنوع المقارنات".. النصيحة السابعة التي توجهها مدربة الحياة تحذر كل سيدة "اوعي تحطي نفسك في مقارنة مع أمه أو شغله، متصغريش نفسك، اهتمي تكوني الجزء المميز في حياته بكل تفاصيله" .

ثامن نصائح السنة الأولى من الزواج هي عدم الاعتماد بشكل كلي على الزوج وتحذر داليا نبيل "اوعي ترمي نفسك عليه وتستني يعملك كل حاجة، لازم تحافظي على حياتك الشخصية واتدربي إن يكون لكل واحد فيكم حياة متكاملة (شغل هدف، أصحاب، دخل، ترفيه) مع ضرورة أن يكون هناك جزء مشترك في الحياة سواء للترفية أو الزيارات العائلية وغيره.

النصيحة الأخيرة التي تقدمها مدربة الحياة داليا نبيل لكل زوجة "حطي لنفسك هدف شخصي وكافحي لتحقيقه ده بيشغلك بشكل إيجابي ومش بيخليكي مركزة مع تفاصيل تافهة توجع دماغك وتجبلك المشاكل والأهم إنك بتحقيقك لذاتك ثقتك في نفسك هتزيد وتتزن ويكون عندك سلام ورضا داخلي عن نفسك وهيخليكي جاهزة لاستقبال أي حاجة حلوة وتقبل الوحش بصدر رحب".

وتضيف داليا نبيل "اوعي تتنازلي عن حلمك ولا ترضي بالإهانة والتنازلات عشان توصلي للسعادة".